政情：大輝暗諷曾鈺成 選特首不自量力

無力維持議會秩序

唔再連任工業界功能界別嘅大輝被外界稱為「金句大師」，早前曾笑稱退任後無包袱，唔介意擔任節目主持論盡議會。言猶在耳，繼早前預言教育局局長吳克儉同商務及經濟發展局局長蘇錦樑等多名高官喺下屆政府肯定「無得留低」，大輝尋日喺電台節目中又發功，談及下屆特首人選時開宗明義話，如果有能力更高嘅人競逐特首，唔會投票畀現任特首梁振英，相反如果其他候選人比梁振英能力更低、更無誠信，就會投票畀梁。

當問及對於曾鈺成揚言打破悶局參選特首嘅睇法時，過去較少評論曾鈺成嘅大輝突然暢所欲言，直指對方作為主席無法解決議會問題，質疑將來佢點解決香港嘅問題。大輝連消帶打，一針見血刺中曾鈺成嘅「弱點」，事關曾近年表面予人較開明嘅形象，事實上喺議會內多次無力維持秩序，試圖做到左右逢源，但實際卻係兩面不是人，一如有資深建制派曾公開發言批評，曾鈺成過去主持會議時太偏幫泛民，令其建制派支持者不只一次懷疑，究竟曾係咪「身在曹營心在漢」。

違政治中立拒辭職

此外，曾鈺成亦不只一次被泛民質疑主持會議時違反政治中立原則，最明顯例子係舊年政改表決「甩轆」收場後，建制派表決前後嘅絕密WhatsApp群組對話揭示，曾鈺成喺表決前關鍵三小時猶如半個「指揮官」，多次對建制派議員「教路」兼「提水」，泛民當時猛烈炮轟曾鈺成要為此引咎辭職，最終曾死撐無違反《議事規則》拒絕辭職，事件先不了了之。

及至今年二月底，曾鈺成嘅「甩轆」再添上一筆，竟然因為點算法定人數出錯，擺烏龍上演「一人流會」事件。事實上，曾鈺成喺出任主席期間，被不同陣營質疑係人係鬼一幕周而復始發生，由此觀之，佢嘅自我感覺良好試圖更上一層樓，會唔會係一廂情願？