中環出更：呢頭拉倒醫改 怪醫又嗌改革
醫務委員會一直被指「醫醫相衞」，本來政府向立法會提交《醫生註冊（修訂）條例草案》用來改革醫委會，但就因為醫學界議員「怪醫」梁家騮拉布，搞到草案最終被拉倒。點知怪醫尋日以醫學會醫委會改革專責委員會主席身份開記者會，提出用行政手段將醫委會處理投訴時間縮短，其實同之前被拉倒嘅草案好相似。有人話，既然怪醫咁想改革醫委會，就唔應該拉倒方案，依家只係假惺惺貓哭老鼠。
倡縮短投訴程序 與草案類近
怪醫話，依家醫委會處理投訴嘅程序過於繁冗，建議以行政手段，即係唔使通過立法會改革醫委會，包括增加秘書處人手、將法律顧問由兼職轉為全職，更硬性規定聆訊日期應該喺決定需要聆訊後一百八十日內進行，認為做咗以上措施就可以將整個投訴程序，由目前五十八個月，縮減至三十點五個月，佢希望以上措施可為醫學會同病人組織建立互信，畀到信心病人。
不過，怪醫作為拉倒改革嘅元兇，依家先嚟假惺惺又有咩用呢？怪醫話，拉倒條例係要維持醫生水平，又批評政府以綑綁手法審批醫生註冊條例，若政府將具爭議嘅改革分開，就唔會令條例通過唔到。佢預計措施會令醫委會每年增加額外一千萬元嘅開支，但由於條例未通過，政府唔會撥款，所以筆錢都唔知點算。其實怪醫又使乜擔心吖，相信業界願意花一千萬元買個保險嘅！
卓妮