中環出更：名人出差港產美食牽腸掛肚
工商界生意人經常出外公幹，部分頻密程度相當高，離港太耐除咗身心疲累，其實仲記掛住香港地道小食。日前沙田馬場舉行「WE LIKE HK」啟動禮，希望喚起港人去發掘及分享身邊美好事物。在場千幾人之中，卓妮遇到好多商界名人，其中「港產陀飛輪」萬希泉創辦人沈慧林（William）就話經常要外出公幹，每次都好掛住香港嘅咖喱魚蛋及格仔餅。
工作忙碌嘅William話，佢喺活動舉行前一日先由重慶返港，而活動翌日就隨即要到杭州、上海一帶公幹。佢話出差時最掛住嘅一定係屋企人，同時亦會對本土美食心掛掛，特別係最鍾意食嘅咖喱魚蛋同格仔餅，所以只得一日時間都要專程去食魚蛋。不過，William認為，出差可以擴闊眼光，又能夠為工作帶來啟發。
何麗詩飲濃普洱助消化
同場仲有鴻星集團營運及發展總監何麗詩（Jacqueline），佢平均一個月出差一次，但由於有個一歲幾嘅囡囡喺屋企，所以每次出差都掛住屋企。佢直言，從事飲食業一定為食，所以有時一落機就即刻去食番碗雲吞麵止癮咁話。不過，為食要有代價，佢就話要勤做運動保持身段，亦都要飲濃普洱幫助消化，仲教路要小食多餐添！
不過，稻香集團主席鍾偉平對出差就有唔同睇法喇，佢話近期正積極開拓內地市場，所以花咗一半時間到內地公幹。但佢認為依家交通方便，即使去上海都只需逗留兩至三日，而往來廣東省仲快捷，所以唔會離港太耐，毋須太牽掛。佢仲話，經營生意唔覺得有壓力，因為能夠享受其中，而每日都過得好開心。
卓妮