政情：公民講場：港台搬竇無期 硬食颱風變形

颱風妮妲帶來八號烈風信號，好彩冇為香港造成重大破壞，但殘舊嘅香港電台（港台）就好似頂唔住喇！與港台廣播大廈相連嘅木工房及道具倉金屬頂部，就懷疑被強風吹到變形，而大廈嘅一、二樓，以及教育電視地下都分別出現漏水情況，真係屋漏偏逢連夜雨囉！兩年前港台新大樓計劃被立法會否決，而預留興建大樓嘅用地又可能被撥作其他用途，睇嚟負責嘅商務及經濟發展局局長蘇錦樑真係影少陣相、出少啲風頭，嗱嗱聲重整港台新大樓計劃，以便提交新一屆立法會審議，否則萬一有高官出席港台節目時發生意外就唔好啦！