政情：湯修齊囝囝 眨吓眼變「巨人」
唔少名人會趁暑假安排子女到海外參加暑期班，家庭與學校合作事宜委員會主席湯修齊（Henry）都唔例外，安排即將升讀拔萃男書院三年級嘅兒子湯德安（Harris）去美國波士頓一間寄宿學校，學習有關美國歷史及政制發展嘅暑期課程幾個星期。Henry趁Harris課程就嚟結束，就同太太同囡囡飛去會合，然後一家人喺附近探朋友兼旅遊，點知Henry一見到阿仔就O晒嘴。
六呎四吋 高到「O晒嘴」
原來幾星期唔見，去年已開始高過爸爸湯修齊嘅Harris又飆高咗幾吋，依家有六呎四吋高，成個小巨人咁，仲高過Henry三吋。Henry話，記得三年前Harris喺三藩市讀暑期班時，仲係一個小朋友，眨吓眼就大個仔。於是搵番當年嘅相片，兩父子再擺番相同嘅姿勢合影，對比之下，真係幾有趣。依家Harris才十四歲，唔知大大吓會唔會成個「移動長城」姚明咁款呢？