香港呢排唔知係咪撞咗邪，罕見天災接踵而至，呢頭「六月飛霜」，嗰頭發生地震，家陣颱風「妮妲」又打到嚟，八號風球掛起，威力隨時猛過○八年超級颱風「黑格比」，加上撞正天文大潮，呢一回雙鬼拍門，真係唔到你唔驚。
咁就唔怪得天文台啱啱掛起三號風球，全城已經如臨大敵，昂坪纜車停駛、機場取消航班、學校停課、動漫節提早收爐，仲有唔少家庭主婦急急衝入街市掃貨，買定兩三日嘅餸添。
冇錯喇，大自然威力無窮，幾時都係小心駛得萬年船。嗱，八年前颱風「黑格比」襲港災情嚴重，其中兩幕「奇景」大家應該記憶猶新，紅磡一幢住宅樓宇五十幾隻窗戶被吹甩，唔知嘅仲以為發生恐襲；至於另一個重災區大澳，唔單止出現七十年一遇嚴重水浸，居民更一度斷水斷電斷糧，幾乎淪為孤島。咪話唔提醒，今次「妮妲」威力比「黑格比」有過之而無不及，市民固然嚴陣以待，港府都要打醒十二分精神，咪又試應對失措、倒瀉籮蟹吖。
最好笑嘅係，港府喺社交網頁預告天文台會喺晚間改掛八號風球，提醒市民做好防禦措施，點知跟手畫蛇添足，話唔知「李氏力場今次會唔會發揮作用」喎。呢啲咪此地無銀三百両囉！天文台應掛風球唔掛，唔應掛亂掛，結果次次添煩添亂，搞到怨聲載道，所謂「李氏力場」，咪就係諷刺港府掛風球唔係講科學，而係傾向大商家囉。
好嘞，咁當局有咩具體應對措施呢？渠務署話會向大澳、屯門及荃灣等多個沿岸低窪地區嘅居民發出海水倒灌預警，以及聯同多個部門設立風暴潮預警系統喎。講真，呢啲措施係就係指定動作，但成效係點，仲要睇過至知。大家有眼見，全港水浸黑點幾十年如一日，幾乎每逢打風落雨都爆大鑊，當局次次都話會吸取教訓，改善設施，結果次次都係大隻講，睇怕今次都幾難樂觀。
當然喇，每次颱風黑雨過後，成個香港滿目瘡痍，除咗水浸、塌樹、山泥傾瀉、冧招牌……亂過亂世佳人，有人形容好似第三世界國家咁，真係一啲都冇誇張。最近河北邢台遭遇特大洪澇災害，死傷慘重，就係因為官老爺麻痹大意在先，應對失誤在後；香港比較好彩，近年天災冇造成嚴重傷亡，之但係講到胡混度日，敷衍塞責咯喎，港產官僚比起國產官僚都係五十步笑百步嘅咋。
正所謂一滴水睇穿整個世界，一場天災，同樣係對一個地方嘅基建水準以至救災應變能力等嘅試金石，港產官僚係龍係蟲，好快就見分曉！