政情：沙田區會足球隊 兩場吞七蛋
繼立法會議員組成足球隊，沙田區議會亦組成咗足球隊，成員包括唔同黨派嘅沙田區議員及其助理。日前沙田區議會應港足傑志邀請，參與「2016年傑志盃」，更踢足兩場，但最後兩場夾埋輸七粒，捧蛋收場。不過，難得有齊建制、泛民議員參與，比賽輸贏亦唔重要，最緊要大家開心。
建制泛民合作踢得開心
沙田區議會足球隊的兩場比賽，分別對Nike同中大，賽果分別為零比四同零比三，區議會隊捧蛋連輸兩場。
有份參與球賽嘅沙田區議員、民主黨秘書長李永成話自己只參與約一場半嘅賽事，指嗰日係首次同建制派議員一齊踢波，認為同佢哋仍有磨合嘅空間，但都踢得開心。
李永成透露，呢次係新同盟嘅沙田區議員陳兆陽促成兩派合作，佢又稱讚陳兆陽喺籌辦方面做得好好，希望佢可以繼續籌辦，並指自己雖然忙於地區工作，但若果再有波踢，佢亦會盡量參與。