政情：陳南祿為士氣 奉陪「廁所飯局」

以證衞生水準五星級

Philip尋日話以往內地搵廁所毋須睇路標，只要靠個鼻，自然有一股氣味指引方向，但去到新近興建嘅商場，呢種情況就要有根本性嘅改變，而佢公司嘅前線員工亦都好落力，就連廁所亦都悉心管理，務求衞生水準可以同五星級酒店看齊。

佢仲透露，公司嘅高級職員曾應上海同無錫嘅商場前線員工邀約，喺廁所裏面一齊食飯，以示對廁所嘅衞生環境信心十足。雖然佢錯過咗呢兩次「飯局」，但為咗激勵士氣，若果再有員工搞廁所飯局，佢都樂於奉陪咁話。

至於佢公司喺香港嘅商場廁所就欠缺條件搞廁所飯局，原因唔係衞生水準不及內地，而係香港地方空間狹窄。佢話內地土地供應充足，商場廁所非常寬敞，內裏不但有足夠空間容納梳化，女廁更可附設梳妝枱，三五姊妹共聚交誼亦綽綽有餘，反觀香港嘅商場廁所普遍狹窄得僅可容身，難以進行廁所飯局。