政情：施子清賞書法 最愛《平常心》
「福建幫」頭領施子清一向都喜愛寫書法，佢尋日出席一個書法展覽時，就點評一幅佢最鍾意嘅書法。呢幅就係書法家馮鶴亭用草書寫嘅《平常心》，佢話呢幅書法夠「創意」，皆因除咗用篆書題背後嘅字之外，亦用草書寫「平常心」呢三隻字，令人覺得唔止係書法，仲係畫，主持人形容咁係「書畫合璧、以畫入書」。施子清又話題字首行「寵辱不驚」好有意思，唔知係咪表達緊佢心境呢？
稱練字有助身心健康
施子清致詞時話，佢寫書法有七十幾年，每日都會有固定時間寫書法，除咗令人精神外，對生活都有幫助，甚至社會更和諧。例如佢試過心情唔好，或者有病痛，寫完書法後，身心好快就可以恢復過來，長期寫書法，仲令人可以好似天上白雲，輕輕鬆鬆添！但佢都話要達致如此境界，唔係三至五年就得，需要八至十年時間苦練。