中環出更：陳思靜議辦變「蜂巢」抗颱風
颱風「妮妲」襲港，部分學校尋日朝早已宣布停課，唔少打工仔女都期待可以打得成風唔使返工，偷得半日閒。不過元朗區議員陳思靜就喺大家滿懷期待嘅時候，忙於抗衡「妮妲」。話說喺天水圍西鐵站外開設貨櫃議員辦公室嘅陳思靜尋日就喺社交網站上載咗佢個貨櫃議辦嘅照片，相中所見，佢個議辦貼滿牛皮膠紙，成個蜂巢咁，有網民就留言，話唔知嘅話仲以為陳思靜被抄家添！
預早為貨櫃議辦買保險
陳思靜就話新議辦開幕以嚟都係第一次面對打風，冇諗過一嚟就要面對有機會係十號風球咁勁嘅颱風。為咗安全，佢尋日就為議辦嘅落地玻璃黏滿牛皮膠紙，又搵咗冷氣師傅檢查冷氣機嘅支架，佢仲話會再搵埋師傅睇吓點樣固定個議辦，以防議辦被風吹走。至於原本住喺議辦嘅兩隻貓，亦會暫時搬去佢屋企咁話。
雖然議辦係貨櫃議辦，但佢話因為背靠一幅牆，而且亦有西鐵站幫議辦擋風，而左右兩邊「牆」雖然冇遮冇掩，但都唔係玻璃，所以應該頂得住，而佢亦早已為議辦買咗保險，所以都唔使太擔心。不過，正如陳思靜自己話齋，梗係唔使去向保險公司申索就最好啦！
卓妮