中環出更：名人爸爸育兒 剛柔並濟
早前保良局舉辦慈善場話劇，宣揚關愛家庭嘅訊息並為轄下綜合家庭服務籌款。卓妮喺活動上見到保良局副主席馬清楠帶埋家人齊齊出席，做善事亦不忘同家人共享天倫，欣賞話劇，完全貼合晒個主題，講起今次話劇內容係有關家庭教育議題時，佢仲透露自己都係一個嚴父嚟添！
見馬清楠同仔女一齊出席活動時好融洽，原來佢話自己平日對仔女都好有要求(口架)，好似德育及個人紀律咁，又會要求佢哋定時作息兼照顧自己，旅行執行李呢啲亦要佢哋自己負責番。不過，佢話教育仲需要身邊朋輩影響，好似出席一個正式場合，如果仔女見到周圍嘅人都穿着端莊得體，表現彬彬有禮，自己自然會學習。佢仲話尊師重道與批判思考冇衝突，希望仔女喺外國讀書時學識點樣有禮貌而理性地與別人討論事情嘅對錯與唔同論點，同時謹記尊重他人。
另一邊廂，新「小巴大王」馬僑生就似乎係慈父角色，呢日佢同太太拍拖到場睇話劇，佢笑言細個時爸爸頗為嚴格，到自己有小朋友嘅時候就主要由太太負責教，因此自己對仔女冇太多規管，只要求佢哋做人一定要有信用，應承咗人哋嘅嘢就一定要做到，做生意時亦同樣應用到。
女強人讓子女發揮所長
香港中華總商會會董蔡關穎琴同香港女律師協會前會長陳慧蕊亦孖住到場支持，佢哋都話平日會讓仔女做自己喜歡嘅事，發揮所長，好似蔡太嘅女兒最近就有參與拍戲，而陳慧蕊雖然自己係律師，但兩個仔都唔係讀呢科，佢認為唔同人有唔同長處，最緊要由細培養佢哋養成凡事盡力，而且不可輕易放棄嘅習慣喎。
卓妮