宇宙最強嘅葉問喺電影中一個打十個，將東洋鬼子打到落花流水，七個一皮，簡直大快人心。不過咁，現實始終唔同電影，香港深受假難民問題困擾，單靠入境處一個打十個，點會唔獨木難支吖。
大家有眼見，入境處為咗抵禦南亞人蛇犯境，做咗唔少工夫，最近仲提出四招應對，包括第一招研究縮短處理免遣返聲請嘅法定時限，由二十五周減至十五周；第二招檢討部門羈留權力，減低聲請誘因；第三招從源頭打擊堵截，要求假難民來源國嘅中國使領館收緊簽證；當然唔少得第四招主動打擊聲請黑工，斷佢哋財路啦，再加埋之前修訂《入境條例》，將適用範圍延伸至更多國家，提高對蛇頭嘅罰則，可以話做得到嘅都盡做，真係勞苦功高o架。
可惜吖，入境處不斷搭台，偏偏有人不斷拆台。嗱，最近區域法院就一宗偷運南亞人蛇案作出判決，內地蛇頭被控三罪全部成立，但只係判監四十個月咁大把，唔止同新修訂法例嘅最高罰則監禁十四年有大段差距，判刑直頭同修例前冇分別，毫無阻嚇力可言，你話修例係咪形同虛設吖？入境處嘅努力點會唔白白浪費吖？
最弔詭嘅係，法官一方面認同人蛇偷渡案有上升趨勢，似有組織犯罪，一方面又唔加強懲罰，反而將未能提高判刑嘅責任歸咎於律政司資料準備不足，到底係律政司水皮定係互相推莊，大家心中有數。都係「東方報業民意調查」嘅受訪者心水清，直指判刑儼如無牙老虎，係冇神經政府放軟手腳同埋司法漏招所致，個個都有責任，呢啲咪叫公道自在人心囉。
即係咁，司法機構對假難民慈悲為懷早就唔係新聞嘞，好似之前有幾單畸士，法庭不約而同判入境處敗訴，話入境處「非法」拘押假難民係唔人道喎，結果賠錢收場。人蛇來港唔止好食好住，仲可以打官司賺錢，衣錦還鄉做暴發戶，可憐入境處盡忠職守反被指摘為「不人道」，你話呢個係乜嘢世界吖？係咪是非顛倒、忠奸不分吖？
俗語都有話啦，一個好漢三個幫。入境處點神勇都好，始終需要其他部門槍口一致對外，可惜吖，現實係司法機構倒米，警方執法求其，再加上港府中門大開，結果係人蛇問題積重難返。正如大部分受訪者話齋，要剷除假難民呢個治安毒瘤，不外乎退出聯合國《禁止酷刑公約》同埋重設禁閉營，入境處已經放聲氣話會全盤考慮禁閉營嘅建議，但最終都係要港府高層拍板，港府繼續冥頑不靈咯喎，就算葉問翻生都打佢唔醒喇。