倒梁口號「Anyone But CY」（ABC），老朽之前在此「販文認可區」指出不是新聞，亦非政治，而係「讖語」，看來好大可能「一語成讖」。未到九月立法會選舉，「雙曾」已同一時間撲出話「我願意！」願意出來挑戰CY，競選特首呢份「衰工」。
曾俊華的識見及能力，大家心裏有數；佢對其沙煲兄弟曾蔭權爵士的讚許令人失笑，曾爵士話要「做好呢份工」，鬍鬚曾就話佢「行政手法一流」。老朽覺得佢吹水手法確實一流，一時吹噓六大產業，一時亂噴香港金融業可養千萬人！鬍鬚曾咁都話一流，不幸佢真係「當蒜」，頂多係「做好呢份衰工」，屆時香港又係重蹈覆轍，分分鐘衰過未嫁時。
至於以《紅棉》一曲透露心迹嘅立法會主席曾鈺成，老朽之前讚佢「有數學頭腦、文學胸襟、歷史識見」，佢去年回應是否參選特首，就話：「如果後生十年，我就出嚟參選，睇你點樣整我！」老朽其時感到曾主席有「趙氏孤兒」之悲憤鬱結。如今佢又表明「若梁振英外無人參選，我會考慮角逐」，即係話佢唔會令CY一個人出閘，孤零零一個人跑又忽然連任！曾主席用心良苦，老朽想起莎翁的《王子復仇記》。曾鈺成今年六十九歲，其實不需後生十年，扮王子冇難度；美國民主黨總統候選人希拉妮同曾鈺成同年，一樣英姿颯颯咁去競選，所以六十九歲絕對係「獨有傲骨幹」，冇咁易畀人搞死嘅！
事實擺在眼前，CY民望低殘，執政四年，經濟民生冇乜改善，卻令社會撕裂，次次遊行都畀人狂呼下台。一個八面受敵嘅行政長官，點扶？即使扶得到都未必好，皆因人緣差，冇可能搵到好班底，身邊又冇人膽敢同佢講真話，「蓋德厚者報美，怨大者禍深」，香港呢個福地何以怨氣如此深？ABC若一語成讖，這原因，你懂的。