政情：大輝炮轟無能局長吳得掂 蘇錦樑非走不可

吳得掂同大輝嘅牙齒印多不勝數，而大輝亦曾批評吳得掂為門外漢。大輝今次對吳得掂嘅評語繼續保持夭心夭肺嘅作風，批評佢任內表現「劣評如潮」、「愈做愈差」，亦指摘佢對教育議題唔熟書。至於吳得掂因遊日賞紅葉而缺席小三全港性系統評估（TSA）一事就畀大輝翻舊帳，指斥佢為「遊埠局長」、「不務正業」囉。

鬧爆吳輕重不分

大輝最後仲話局長應勤政愛民，識得衡量輕重，唔會因私忘公，但吳得掂就係冇將工作放喺首位，所以預計佢喺下屆政府班子中肯定「無得留低」，否則天怒人怨咁話。

另一位被大輝插得最勁嘅官員，就係商務及經濟發展局局長蘇錦樑（Greg蘇），大輝形容Greg蘇表現拙劣、甩轆事件眾多。提到「作罷」收場嘅《二○一四年版權（修訂）修例草案》，大輝就引述傳聞，指有建制派議員私下批評Greg蘇為「豬隊友」、「搞乜衰乜」，狠批佢無法同建制派打好關係。

狠批蘇表現拙劣

而香港旅客持續下跌就當然關Greg蘇事喇，大輝不滿Greg蘇一味怪責示威者，但又無提出應對措施同改善方案，認為Greg蘇能力有限，所以即使佢近期積極用社交媒體為自己宣傳，相信都難以連任。

除咗吳得掂同Greg蘇，仲有其他官員中箭，但程度相對較輕，起碼無畀大輝話無得留低先。環境局局長黃錦星就被大輝點評缺乏政治手腕、推銷政策技巧拙劣。至於自爆見過蘋果公司創辦人之一喬布斯嘅創新及科技局局長楊偉雄，大輝抽水之餘亦不忘提醒佢避免自我吹噓，否則只會成為市民笑柄，都算有錫住楊偉雄喇！

今次對問責官員嘅點評都算係大輝最後一擊，唔知佢卸任後仲會唔會繼續踩官員，為大家提供花生呢？