中環出更：一人拉布戰罷 怪醫專注錢途
第五屆立法會上月中曲終人散，立法會醫學界議員梁家騮（怪醫）臨尾上演咗一場「一人拉布戰」，成功將改革醫務委員會嘅《二○一六年醫生註冊（修訂）條例草案》拉倒，都算喺佢做咗八年任期唯一洗擦懶蟲形象嘅「創舉」。佢早前接受訪問時話，退出議會之後會專注診所工作，更笑言自己做醫生叻過做議員好多，未來應該唔會再喺台前亮相，反而會退居幕後度橋。
開會出席率低 常被罵懶蟲
怪醫本身喺議會都已經神出鬼沒，次次問佢去邊，佢都會話返診所診症，而因為出席率低，年年佢都被批評係懶蟲。佢離開議會之後，理所當然係專注自己嘅診所喇！咁都不特止，佢仲會去公立醫院兼職，實行落力搵真銀。問到日後有冇機會重出江湖？佢就耍手擰頭，笑言自己做醫生叻過做議員好多，未來應該唔會再喺台前亮相嘞！
再追問若果草案再次提交立法會，到時可以點做？怪醫就話醫生代表應該提出一個更進取嘅方案，不過都係到時先算喇！講到有冇興趣加入一同反對草案嘅醫生組織「杏林覺醒」，佢就話冇興趣。
卓妮