中環出更：沙漠雙「雄」潤膚液潤唇膏
近年嚟每年都會舉辦極地探索之旅嘅仁愛堂，日前同一大班學生一齊舉辦「綠色絲路探索之旅2016」啟程典禮，主席鄧錦雄同班總理都有到場支持，仲分享過往去沙漠的經歷添！
仁愛堂喺過去幾年分別帶學生去過南極、北極、珠穆朗瑪峰同南美洲亞馬遜等地，今次佢哋就會帶班學生喺今個月內到訪中國古代絲綢之路嘅必經地—新疆塔克拉瑪干沙漠。鄧錦雄仲溫馨提示學生記得帶潤膚液同潤唇膏，因為當地真係好乾燥，又笑言自己去沙漠印象最深刻嘅係去洗手間時吹到一面沙，不過去沙漠的確係好難忘嘅經歷，希望學生可透過體驗沙漠呢個咁具挑戰性嘅環境，提升個人嘅抗逆同解難能力。
蔡小勇回味滑沙刺激感
亦去過沙漠嘅副主席羅台秦笑言年輕時唔識得防曬，淨係覺得好玩，依家如果再去一定會做足防曬準備，佢又話沙漠雖然好熱，但由於乾燥所以唔會點出汗。至於總理蔡小勇就對於喺沙漠滑沙特別回味，佢話玩滑沙嘅地方有三層樓咁高，但唔算好斜，都幾刺激o架！
同場仲有總理洪光椅話佢哋年輕時冇依家啲小朋友咁幸福咁多資源，更加冇乜團體舉辦呢啲考察活動，當年讀完書大家都忙住工作搵錢養家，所以依家有能力，都希望可以幫多啲年輕人，佢仲話讀萬卷書不如行萬里路，好鼓勵年輕人把握呢啲機會見識吓，好似佢個仔去英國讀書佢都相當支持咁話。做珠寶生意嘅劉臣峰總理就話，好多人以為做珠寶嘅都會好熟悉或者經常去一啲寶石產地，但其實唔係咁，因為開採、加工同貿易已經好唔同，佢就唔算經常飛，但有機會都想多去唔同地方了解吓喎。
卓妮