近排全城最hit話題，非捕捉小精靈莫屬，大街小巷、水塘甚至郊野公園，通處都係，不過捉唔到都唔使失望，事關懶蛇一樣遍地開花，小嘅可以喺街搵吓人口普查統計員，大嘅可以去泳池海灘搵康文署救生員，包保梗有一個喺左近。
先講小懶蛇。前排之嘛，有人口普查統計員喺網上「晒命」，自爆點樣延遲兩小時返工，以及自製「悠長午飯」時間，又形容「每日過住食白果嘅生活」，「確係筍工無誤」，結果喺網上瘋傳，引發圍插。
又難怪嘅，返工遲到早退，人工照(手+豆)不誤，以為只係尊貴立法會議員嘅「專利」喇，估唔到家陣居然後繼有人，你話唔嬲就假。講開又講，今次人口中期調查都算烏龍百出，俗稱「尿袋」嘅平板電腦充電器淪為流動炸彈、網上問卷及流動程式伺服器被揭發有保安漏洞，再加埋今次統計員集體蛇王，簡直係沒有最混亂，只有更混亂。
咁統計處又點解畫呢？佢哋話喎，已經嚴厲訓示及口頭勸誡違規統計員，並提醒其他人緊守崗位及遵從工作守則。咁又係吖，開講有話，小時偷針，大時偷金，班統計員仲係學生哥，年紀輕輕已經練精學懶，將來前途肯定無可限量，即使做唔到立法會議員，都可以入行做救生員。
唔係講笑(o架)，救生員三日唔埋兩日搞工業行動，郁吓就集體請病假，以封池封灘為要挾，搵市民嘅利益作為同當局談判嘅籌碼，淨係舊年就至少發動十五次集體請病假，每人每年平均亦有十幾日，搞到天怒人怨。最離譜嘅係，有救生員直認放假期間走咗去做私人游泳教練，仲話泳季高峰接job接到手軟，一粒鐘賺幾舊水，都咪話唔和味。你話嘞，救生員秘撈搵真銀不甘後人，公家嘢就冇人理，咁搞法請幾多人都唔夠喇。大懶蛇偷懶之餘仲要食兩家茶禮，着數攞到盡，小懶蛇享用「悠長午飯」，小菜一碟咋！
講到蛇王之王，唔能夠唔提救生員工會阿頭郭紹傑。佢老哥前年佔中期間以「跌斷鎖骨」為由放緊「病假」，點知一個屈尾十擔任漢奸黎「貼身保鏢」，當中有冇蠱惑，畫公仔唔使畫出腸。係嘞，康文署咪話徹查係咪有人呃病假嘅，點解冇咗下文，唔係怕有人喺背後撐腰啩？
所以話，精靈訓練員日以繼夜，夜以繼日，不辭勞苦，港府捉懶蛇有一半咁熱心，香港就唔會好似依家咁七國咁亂，烏煙瘴氣喇。當然，「打蛇」最緊要都係一視同仁，千祈咪好似處理佔領搞手咁抓小放大，麻鷹唔管管雞仔呀！