政情：梁世民：女仔做牙醫冇咁易殘
早前有統計指本地咁多唔同科目嘅大學畢業生，以醫科、牙科及護理等畢業生嘅入職薪金最高。牙醫學會會長梁世民（Sigmund）就話，現時香港人口老化問題嚴重，長者將會愈來愈多，社會對牙科及醫療嘅需求均會持續上升，所以牙科畢業生可謂非常吃香。
Sigmund話，依家其實唔止牙醫渴市，連帶市場對牙齒衞生員亦非常渴求，負責幫病人洗牙等工作。佢仲話，現時唔少畢業生希望工作與生活平衡，唔少大機構和慈善團體長期請唔到牙醫，喺牙醫不足嘅情況下，更不介意開出彈性上班時間條件，佢聽過有啲一星期只係返三日工，其餘時間可以自己進修又得，最緊要對方肯返工，總好過完全冇人做。
唔使輪班工作
不過，講返當年佢入大學讀牙科時，雖然並唔容易，但亦有同學獲派牙科後唔想讀，寧願轉去其他學系。相比起依家牙科就多咗唔少女生選讀，事關女仔讀牙科有個好處，就係唔使好似其他科嘅醫生咁輪班，個樣都冇咁易殘喎！