政情：脫歐影響 「李」「施」各有睇法
英國脫歐對於本港經濟有幾大影響，仍然係眾人關注嘅事，其中中華廠商聯合會會長李秀恒及前會長施榮懷都有唔同睇法。李秀恒話，廠商好少直接喺歐洲等地投資，但係可能會有代理賣廠商嘅產品，英國脫歐後，幣值、關稅等問題仍未明朗，仲要有恐襲及經濟不景等問題，心理上會有憂慮，相信廠商唔會諗喺歐洲搞新嘅大計劃，亦會暫停喺英國買物業或寫字樓，預計港商下半年喺歐洲嘅出口，會下跌百分之四至五。
或影響進出口
至於施榮懷就話，脫歐暫時未見對廠商有大影響，個人認為脫歐最重要係會否影響其他歐元國家，會否引發貨幣危機，若英鎊貶值後，現時無骨牌性影響其他貨幣大幅貶值，大家暫時可以放心。不過，距離脫歐仍有數以年計嘅時間，目前仍難預計對英國未來經濟有幾大影響。佢認為，部分廠商或會擔心喺英國訂貨後，貨到時，英鎊再貶值就要蝕錢，相信對進口有一定程度影響。