中環出更：型男雲集 大談賽車經
賽車嘅速度感令唔少男士着迷，但要試過才領略真正滋味。早前卓妮喺一個酒會上見到「M超跑會」創辦人馬仁威（Kelvin）、香港汽車會永遠榮譽會長雲維熹（Wesley）及香港鐘表業總會前主席陳正欣（Daniel）三個大男人傾得好開心，原來大家都係賽車發燒友。Daniel自爆，幾年前試過去上海一級方程式賽車場訓練，可能年紀大，反應唔夠敏銳，所以訓練完之後都係唔敢落場玩，都係欣賞賽事算喇！
早前法國駐港澳總領事館舉行法國國慶酒會，逾百賓客齊去趁熱閙，三位型男一講到賽車就停唔到口。Wesley聽Daniel嘅體驗都好有同感，趁機呻話早已同政府講，想解決香港嘅非法賽車問題，只需起一個正規賽車場，因為車手玩一個周末就成身散晒，仲邊有精力喺公路上賽車？
馬仁威太弗 買衫要訂造
Kelvin都話，香港係國際城市無理由欠缺正規賽車場，但政府一直置若罔聞都冇符喇！佢會同一班志同道合嘅朋友去台灣玩，事關當地賽車場收費平又實際，雙方仲簽埋合同添！內地都有好多靚車場，咁點解唔去內地玩？Kelvin笑笑口話，內地醫療系統令人唔放心，驚有咩事就大鑊喎！
同場仲有型格設計師Zhor Tiber等人。法國係世界潮流之都，貪靚嘅Kelvin都經常訂製法國男裝，皆因佢身材弗爆，着起國際名牌嘅標準男裝仲好鬆身，有時只能着童裝尺碼，故惟有度身訂造喇！
卓妮