政情：網民六合彩中晒隔籬 曹宏威：我未發功吹歪咗
萬眾期待嘅億元六合彩前晚揭盅，有網民就喺社交網站上載投注紀錄截圖，顯示佢所選嘅號碼全部係中獎號碼嘅前後號碼，堪稱黑仔王之最，有網民取笑發貼者係「燈神」，亦有網民形容係「連科學都解釋唔到」。生物化學界權威、香港科普協會創會會長曹宏威對呢個網民熱話亦稱無法解釋，更講笑話「可能因為我未發功，吹歪咗咪中唔到囉！」
笑稱對信仰「守身如玉」
曹宏威話，買六合彩係講概率，即使咁嘅情況出現嘅概率好低，但都會出現。對於黑仔王網民嘅遭遇，佢都只能笑嘆解釋唔到喇。
曹宏威尋日出席一個書展講座時談及信仰，話自己一直「守身如玉」，未有一個特定宗教信仰，但相信人生有兩個工程，一係集散、二係遇過。佢又自爆自己大學畢業時「遇」到份工，但被佢「過」咗。話說佢大學畢業後應徵咗份大公司嘅工，但最後就唔敢去做，原因係該公司要求佢去管理一大班女工。
曹宏威話，當時啱啱畢業未管過女人，聽到都手騰腳震，所以就拒絕咗。不過，依家諗番轉頭，如果接受咗份工就要經常接觸化學品，未必係好事，所以做人最重要都係心安理得喎。