政情：林雲峰野餐 呼喚釋放公共空間

Bernard話，佢當年喺城規會有份決定將添馬公園一半範圍劃為公共休憩用地，希望市民都能夠享用公共空間。但時至今日，香港有唔少公園為管理而加設圍欄，甚至以保養為由禁止踐踏草地，情況喺外國甚為少見，所以佢專登搞野餐去凸顯呢個問題，希望唔好再將人同公共空間隔絕。

專業人士經常西裝骨骨示人，去表現出踏實、穩重嘅一面，但Bernard尋日就突然轉風格，頭戴淺藍色草帽出現於添馬公園，猶如民歌王子，佢話呢身打扮並非新造型，只係去野餐先着得輕鬆啲、親民啲。尋日天氣酷熱，如果着西裝去野餐實會汗流浹背，又難怪Bernard要輕裝示人喇。