政情：港台新大樓 「無地」自容
亂象不絕嘅香港電台（港台），除咗節目被形容「陰陽怪氣」外，最近又爆出署理助理廣播處長陳敏娟不獲「升正」風波，港台工會成員喺出席自己舉辦嘅頒獎活動時集體着黑衫抗議，又喺自己老細廣播處長梁家榮接受傳媒訪問時踩場舉牌示威，自己落自己面，負責出糧畀佢哋嘅納稅人見到都眼冤。立法會工務小組委員會喺兩年前否決撥出巨款畀港台興建新大樓，依家睇番轉頭，可謂本屆立法會少有嘅功績。
講開港台新大樓，聞說當局已應議員要求削減其規模及建築費用，但依家又面對一個新問題，就係一早預留畀港台建新大樓嘅用地，可能會被撥作其他用途，令港台興建新大樓嘅大計隨時一拖再拖。
屢揭大花筒前科
商務及經濟發展局（商經局）喺三年前正式提出港台新大樓計劃，旋即引起各界嘩然，因為工程費用高達六十億元，較當局幾年前嘅初步估算急升接近三倍，亦較好多同級數嘅政府大樓或私營傳媒機構總部貴好多。加上港台過往多次被揭發亂花公帑，令人質疑港台再次「大花筒」興建超豪總部。商經局其後曾作出修訂，將新大樓工程費略減至五十三億元，但撥款申請最後仍喺一四年初遭工務小組否決。
居民憂遮擋景觀
商經局當年講過會用約兩年時間重新設計新大樓，以削減其規模及開支，據聞有關工作已接近完成，但可能又要面對「土地問題」。事緣港府當年預留位於將軍澳第八十五區嘅一幅用地畀港台，該用地面積多達三十三萬平方米，原因係新大樓原定需要嘅淨作業樓面面積亦達三十萬平方呎。但隨着新大樓縮減規模，用唔盡嗰幅地嘅地積比率，而根據「地盡其用」嘅原則，港台好應該讓出土地作為其他用途，轉搵另一幅較細嘅土地興建新大樓。
至於原本幅地有乜用途呢？對現屆政府嚟講，當然最好就係興建住宅，但此舉可能涉及更改土地用途，肯定又會喺區議會及城規會爭拗不斷。另一個說法係，幅地附近已經係住宅，當區居民自然唔想起樓遮擋現有景觀，最好就用嚟起停車場等較矮嘅建築物，甚至改做公園等公共空間。據聞政府內部仍對有關問題拗緊數，未有最終定案，換言之港台新大樓計劃遙遙無期。