中環出更：李偲嫣出書「拜山三寶」贈興

正義聯盟李偲嫣日前趁書展出咗本情書，原定尋日會喺位於一樓展館嘅出版社攤位舉行見面會，點知偲嫣撞車搞到遲大到，仲要臨時轉場，真係出師不利囉！偲嫣嘅見面會，除咗吸引大批傳媒外，仲有二百多名市民一早到攤位等候，更有熱心市民準備「拜山三寶」，即係缽仔糕、檸檬茶、紅玫瑰撐場，聲稱要為偲嫣贈興。

見面會原定下午三點舉行，但偲嫣所坐嘅的士喺西隧遇上交通意外而遲到，加上人流太多，見面會除咗要延遲，更要移師到地下舉行，搞到等候已久嘅市民極為不滿，甚至有人大叫「回水」添！而最終見面會參與人數，就由高峰期二百多人，急跌至不足十人，認真失威。

不過，肯留低嘅粉絲嘅都係「忠實」，有人玩嘢親吻偲嫣隻手，又開埋檸檬茶畀偲嫣飲，最後擾攘咗成五分鐘先落台，成功搶晒鏡！但偲嫣心情似乎就無受到踩場影響，佢仲自信話新書喺網上訂購有成一千四百本，加上見面會時間超時結束，唔知會否為偲嫣打下強心針，繼續添食呢？

卓妮

中環出更：李偲嫣出書 「拜山三寶」贈興