同文抵死，由「北港香爐人人插」聯想到梁振英之被「人人插」。李昂呢本小說出版於一九九七年，距今十九年，屈指一算，亦正好是香港回歸十九年，同文由此聯想，未知是巧合還是另有寄意？當年呢本小說哄動一時，「北港香爐人人插」屢被對號入座；十七年後，作者的另一本小說《路邊甘蔗眾人啃》又影射另一政治名男。
其實，政治有時又唔係咁枯燥，睇吓有啲人一生被權勢迷惑，毛澤東乃非常人物，是以與天鬥、與地鬥、與人鬥都能其樂無窮，之不過，沒有老毛的雄才謀略又要好鬥，分分鐘變得面目可憎，風流人物你估咁易做咩！
一個政治人物，若民望低迷，加上四面楚歌，八面受敵，又被「人人插」，再糾纏於權勢，便是昧於形勢，所謂「大愚誤國，只為好自用」。講真，一個人身家至少五千萬元，又咁鍾意務農種吓粟米，大可以笑傲山林，「山中習靜朝觀槿，松下清齋折露葵」，何必一行出嚟就畀人噓到上天花板，真係唔插都死。
老朽理財不善，加上不好鬥，安分而已，常懷上天厚我之情，閒居野村，讀書寫字，每日習靜半小時，日子有功，今亦略懂蘇東坡「無事此靜坐，一日似兩日」之哲理。心平氣和，人冇殘得咁快，有空就去街市買幾支花回家插，此插不同被人插，境界高過叫人「實事求是」。
同文撩起「人人插」，老朽翻尋了一日，終在書架找到呢本小說，不禁又讀了一次，作者對「人人插」嘅小說女主人林麗姿雖極盡揶揄、調侃，但女人要用自己嘅身體來作為顛覆男人、贏得權力嘅策略，都要用好多心機同計謀；要把「公廁」變「豪華公廁」，讓男人沒排上的會感到沒跟上時潮、若有所失！這就是努力付出的成果，豈能守口如瓶當法寶，叫人吹你唔脹就大晒？