政情：張文光追住匯率遊英日
英國脫歐公投之後英鎊大跌，可以話係去英國旅行嘅好時機，甚至有升學機構以此招攬應屆中學文憑試考生前往英國升學。立法會前議員張文光就打算喺九月之後前往英國旅行，直言貪依家去英國玩夠晒平。其實張文光早前先趁日圓低位，去日本玩咗一轉，莫非佢係跟住匯率去旅行？
張文光尋日就話雖然啱啱先去完日本返嚟，但已經又開始緊盤算去英國，直言係因為貪脫歐後英鎊夠晒平。佢又透露去日本時已經撞啱係日圓低位，所以好抵玩、好開心。
被問到係唔係「追住」各國嘅匯率去旅行，佢就笑笑口話：「都唔係嘅」，最重要係自己本身都想去嘅。
面對咁抵玩嘅匯率，相信唔少人都會趁機「血拼」掃貨，咁佢太太有冇趁匯率低而掃名牌手袋或其他貨品？張文光就話好彩老婆唔好呢味，所以佢哋主要都係去睇名勝古蹟喎。太太咁賢淑，張文光係咪都要諗下點「獎勵」太太呢？