政情：歐洲恐襲頻頻 陳繁昌改遊美
歐洲各國恐襲頻生，尋日更有港人喺德國火車上遇襲。科技大學校長陳繁昌都話被恐襲嚇到，今個暑假決定唔去歐洲旅行，轉去美國探望子女，享受天倫樂。
不過，美國都有槍擊事件喎，陳繁昌反而話唔驚！原來佢當年喺美國讀書，畢業後又喺當地教書，已經見慣校園暴力事件。佢話呢啲校園案件大部分施襲者涉及精神問題，同充滿針對性嘅恐襲係兩回事。
佢憶述喺耶魯大學執教期間，曾經有同事收到一封來自學生嘅信，豈料封信竟然內藏炸彈，同事一打開就遭炸彈炸盲咗一隻眼。佢又話當時美國出現大學炸彈客（Unabomber），而佢哋通常係學生，因為同教授嘅關係差而報復。
師生融洽 無懼大學炸彈客
佢笑言唔擔心自己成為被炸目標，又話自己雖然唔會對學生嘅成績「手鬆」，但一定會公平處理，更即場同學生大合照，證明師生關係融洽添！