政情：夏千福執包袱拍惡搞片
美國駐香港及澳門總領事夏千福一早預告會喺今個月卸任。領事館尋日喺社交平台上載咗段短片，條片一開始就見到夏千福喺度執紙箱準備走人，仲用廣東話講「好掛住好味嘅雞蛋仔」。然後段片惡搞周星馳主演嘅《西遊記第壹佰零壹回之月光寶盒》，佢首先打開個「寶盒」，回顧番佢在任三年嚟喺香港參與過嘅活動，好似去薄扶林整蛋糕同去錦田舞下刀弄下槍咁。
離任後下月將回港
早前有網民喺社交網站Facebook嘅直播中問夏千福，會唔會幫襯一間出名「難食」嘅壽司店，佢今次就喺片中以《月光寶盒》嘅經典台詞去回應：「曾經，有一份壽司擺喺我面前，但係我無好好珍惜，等到失去嘅時候先後悔莫及」、「如果上天畀我多啲時間，我或者會去食」，另外佢又強調好愛香港：「我真係好愛香港，如果要喺呢份愛加上一個期限，我希望係一萬年。」
夏千福喺短片一副依依不捨嘅樣，實情係佢今個月離任後，下個月就返嚟香港加入一間私人機構。