政情：拉布罪大惡極 泛民民望急瀉
隨住第五屆立法會嘅會期結束，又係時候由市民為全體七十位立法會議員埋單計數。有大學民意調查機構就市民對七十位議員嘅支持度進行調查，發現最具知名度嘅幾位泛民議員嘅支持度均全線下跌。其中喺對改革醫務委員會嘅《二○一六年醫生註冊（修訂）條例草案》拉布、立場反口覆舌嘅公民黨（公文袋）、其身兼黨魁嘅議員梁家傑（袋巾傑）評分跌幅最大。泛民喺立法會拉布拉到破晒歷年紀錄，就連同民生息息相關嘅醫生註冊條例草案都被拖垮，泛民民望插水都真係咎由自取喇！
AV仁李卓人評分同下跌
香港大學民意研究計劃喺今個月十一至十四日、即立法會會期完結前，就本月初由市民選出嘅十二名最具知名度嘅立法會議員民望，訪問咗大約一千名市民。調查發現只有已宣布退休、冇參與草案拉布嘅民主黨（白鴿黨）主席劉慧卿評分上升，比四月同類調查上升二點五分至四十六點六分，其餘榜上有名嘅泛民議員評分均全線插水。
跌幅最大嘅係袋巾傑，由四十八點二分下跌三點四分至四十四點八分，成為跌幅最大嘅議員，其次就係喺會上發言講到同建制派嗌交嘅社民連議員梁國雄，評分由三十八點八分，下跌二點三分至三十六點五分。而同樣上榜嘅白鴿黨嘅何俊仁（AV仁）同工黨嘅李卓人嘅評分，亦都分別下跌兩分同零點八分，得分為四十點六分同四十一點五分。
公文袋一黨三立場鬧笑話
得出咁嘅結果，無他嘅，事關喺立法會今個月審議醫生註冊條例草案，草案關乎醫委會改革同埋加快處理病人投訴，公文袋先係鬧出該黨六名議員投票取向出現「一黨三立場」嘅笑話，繼而再有黨員反口，要求政府接受黨友郭家麒嘅修正案，否則就會就條例草案積極發言，再到袋巾傑公開發表聲明，講到明話要喺餘下審議過程積極發言，變相同反對條例草案嘅醫學界議員梁家騮（怪醫）齊齊拉布。條例草案最後就畀佢哋拖到難產。
喺今屆立法會，泛民拉布無所不用其極，搞到不斷流會，犧牲市民同弱勢社群訴求亦在所不惜，令到立法會嘅形象低落，更被評為「垃圾會」，佢哋拉布拉低埋自己民望都係活該。