中環出更：潮人盂蘭宣孝道
每年農曆七月，除咗有「七夕」呢個咁浪漫嘅傳統節日外，唔少人仲會諗起俗稱「鬼節」嘅盂蘭節，不過其實盂蘭節係一個非常強調孝慈感恩的傳統節日，人們會透過祭祀祖先同超度亡魂以保家宅平安。為咗宣揚呢種文化，香港潮屬社團總會嚟緊整個八月將與過百間食肆合辦「孝慈+愛‧夏日盛宴」活動，推出以盂蘭節同七夕為主題嘅菜式，增加大家對傳統嘅認識。
講起孝道，主席陳幼南話以前都試過煮嘢食畀父母，皆因佢有個世伯廚藝了得，所以跟對方學過點樣炮製潮式滷水鵝，一醃就近兩個鐘，但事前冇學過煮其他嘢嘅佢一嚟就挑戰高難度，笑言父母食完之後完全冇反應，佢自己試過味道正常，不過硬係唔夠出面啲師傅整得咁好食喇！不過，講到最窩心則係細個跟阿媽一齊用石磨整米糕，中間加啲菜餔就好好食，出面想買都買唔到。
至於日前啱啱過生日嘅會董胡炎松就有阿仔孝順佢嘞！佢話日前去咗新加坡同太太及兒子一同慶生，因為個仔正喺當地律師行實習，雖然係佢飛過去，但去到之後阿仔就幫佢排隊排咗成個鐘，買出名嘅海南雞飯畀佢食，成個冧晒。不過，佢就話自己都算係一個嚴父嚟，雖然平日唔會打仔，但都試過一次例外，事關嗰次阿仔鬧嫲嫲，實在太唔尊重喇，不過都係一次咁多，依家阿仔梗係又識做又孝順。
林月萍教唱rap版童謠
同場仲有民政事務局副局長許曉暉、永遠名譽主席許學之、常務副主席張成雄同會董林月萍等。林月萍話，雖然香港好多「家己冷」，但年輕嗰班連潮州話都未必識講，佢哋希望透過活動將盂蘭節嘅傳統意義推廣，如果有興趣佢仲可以教大家唱rap版嘅潮州童謠。
卓妮