醫務委員會改革最後功敗垂成，食物及衞生局局長高永文事後表明，將來會提出一個更全面建議，當中包括考慮係咪設立獨立醫療投訴機制。雖然呢幾日醫學界對此都表示歡迎，但觀乎早前醫委會改革草案，由冇爭議到醫學界以至泛民都反枱，難保下次再提出改革，班醫生又會用各種方式反抗，所以大家都係放長雙眼，睇吓醫生係咪用緊權宜之計先啦。
高永文喺上周五晚，即係草案即將難產之前，指呢個佢形容為「平衡、溫和，向前走一步」嘅方案都被拉布，如果原封不動再攞出嚟，唔相信可以順利通過。高永文話，會等兩至三個月後，公布醫護人力資源策略性檢討報告，作更大改革。
當中更具爭議嘅就係設立獨立醫療投訴機制，即係將來醫委會唔再處理醫生專業操守投訴，研訊未必係由醫生主導，預計報告公布後，仍需進行公眾諮詢，然後再立法，相信本屆政府餘下任期未必能夠推動。
主力拉布嘅醫學界議員梁家騮（怪醫）尋日出席電台節目，就聲言支持將接受投訴同紀律聆訊嘅機制獨立出嚟。佢仲話可以效法法庭審訊程序，隨機抽出合資格市民同醫生做陪審團。
醫學會候任會長蔡堅就較為坦白，佢早前接受訪問話唔介意拆開投訴機制，但若拆開後由業外人士主審，喺缺乏知識下，可能會拖延聆訊，擺明力撐由醫委會繼續審理。
佢哋講到好似有得傾，但成立嘅獨立醫療投訴機制，成員好大機會咪又係特首委任，醫學會到時會唔會重施故技，又再以此反枱？醫委會改革真係路漫漫！