政情：丘成桐：讀數最賺錢最舒服
蜚聲國際嘅港產數學大師丘成桐尋日現身公開大學擔任講座嘅演講嘉賓，主要講解數學應用點樣喺醫學同其他日常生活範疇中發揮作用。佢仲提到現時香港嘅學生同家長都過於急功近利，想要出人頭地，為少少好處而唔願意做深入嘅學問，但其實讀數學先係最賺錢同最舒服嘅行業。
唔明點解家長想仔女讀金融
佢笑言自己每星期空閒得很，行行企企諗吓數學壓力唔多，而佢個仔讀醫學雖然十分好，但眼見佢由早做到晚上十點先回家，一星期做足六、七日好辛苦。佢好疑惑點解有啲家長唔鍾意仔女讀數學，反而想佢哋讀金融，以為金融一定搵到錢，佢就講起自己另一個仔哈佛大學一畢業出來就做金融，做咗兩年先發現係一個悽慘嘅行業。
被問及數學能否應用在預測金融市場走勢上，佢就指金融市場變數複雜好多，有人花二、三十年研究到，但對方都唔會將呢個方法透露畀其他人知。
科大校長陳繁昌亦都有去聽，原來佢哋相識三十幾年，陳繁昌話當年喺史丹福大學讀書時，丘成桐負責教數學，不時有機會見面，加上當時校內香港人唔多，好容易就認出大家。