中環出更：陳敏娟署任一年未坐正港台員工穿黑衣抗議
香港電台內部立立亂，早前有傳香港電台助理廣播處長（電視及機構業務）陳敏娟疑因「未能促進協作（synergy）」，署任該職位一年仍未能「坐正」。港台節目製作人員工會尋日趁住內部頒獎禮，發起員工穿黑衣抗議行動，要求與廣播處長梁家榮會面，以釋除疑慮。
頒獎禮舉標語促釋疑
梁家榮同陳敏娟尋日都有出席閉門頒獎禮，負責頒獎畀港台得獎同事，在場有近百名港台員工穿上黑衣，仲喺頒獎禮上高舉「歲次失序、難釋眾慮」同「無則無準、疑竇必生」標語抗議。
據引述，梁家榮喺頒獎禮上感謝陳敏娟過往「辛勞」，欣賞對方一直工作拚搏，電視部喺佢嘅領導下先有咁嘅成績，係好嘅領袖，而陳敏娟則感謝同事支持，希望未來「處長、副處長多些支持」，又感謝同事喺一四年頻道試播以嚟嘅努力，指大家無私無懼，落力做好工作。梁家榮喺頒獎禮後，冇回應傳媒提問就離開。
工會發言人黃雅文會後話，既然梁家榮肯定陳敏娟嘅工作，點解至今仍要署任，對此產生更大嘅疑惑。工會要求本周內舉行員工大會，由梁家榮直接解釋。該會面暫定喺聽日嘅午飯時間舉行。