中環出更：鋼之煉畫「菁英」
早前有鋼筆品牌與茶行合作舉行中西合璧嘅藝術展覽，展出當代畫家Hom Nguyen嘅作品，吸引唔少城中熱愛品茗同藝術嘅名人到場參觀。菁英會主席盧金榮同百仁基金副主席羅詠詩（Anthea）亦有到場，仲親自動手試畫，見佢哋拎起支筆嘅時候似模似樣，但畫完之後就笑到收唔到聲。
話說當日展出一名法國籍越南裔畫家嘅作品，希望透過繪畫絕望同無奈等唔同嘅眼神，表達受種族歧視嘅人嘅內心感受。見到啲畫作咁有深度，大家梗係要過吓手癮，有份籌辦活動嘅菁英會委員王詩雅、盧金榮、區議員李進秋同Anthea都忍唔住拎起鋼筆試畫，但畫完之後則相視而笑。點解？事關明明大家畫人，但唔知點解畫完變咗猴子咁樣。
盧金榮自學彈琴氹囡囡
Anthea笑言返到屋企阿仔見到佢幅畫，問佢畫嘅係唔係之前旅行時見到嘅長鼻猴，令佢大受打擊。個仔知道真相之後仲笑笑口話唔怪得自己視藝科冇乜天分，原來係遺傳。另一邊廂，盧金榮似乎係畫得最好嗰個，畫廊職員仲話會將佢幅畫寄返去畀個畫家睇吓添！盧金榮話讀書時畫畫只係一般，所以都唔多畫，反而之前佢為咗氹兩個囡囡開心，上網睇片自學彈琴，學咗幾星期依家都叫識彈幾首出名嘅歌o架！
本身係榮源茶行創辦人女兒嘅王詩雅又話，茶同鋼筆分別象徵中西兩種唔同文化，而過往茶予人嘅印象大多比較傳統，為咗令年輕人都愛上茶文化，佢哋近期推出一款有氣無糖嘅茶，呢日仲用嚟當香檳咁款待嘉賓，新鮮又特別，夏天雪凍嚟飲仲好解渴添！
卓妮