政情：林亮逛書店 「獵」創作靈感
以製作塑膠小黃鴨而揚名嘅本地工業家林亮，創意靈感特別多。皆因佢閒時逛街，最愛四處「獵取」最新嘅設計意念同潮流訊息。
咁啱尋日下晝就見到林亮步入中環太子大廈商場一間書店，仔細端詳貨架上各款立體賀卡。佢話唔係入去購物，而係趁住同友人約會時間未到，喺商場用對眼「打獵」，睇下時興嘅潮流產品，有乜嘢優秀之處可以借鑑，而今次佢就注意到賀卡嘅色彩配搭非常悅目，對於玩具產品以至包裝設計而言，皆極具參考價值喎。佢話市場競爭激烈，欠缺創意嘅產品好難賣得好價錢，再加上活到老學到老，得閒睇多啲知多啲，實無蝕底。
（徐家浩攝）