政情：轉形象似馬明陳弘毅唔敢照鏡

曾擔任澳洲會計師公會大中華區分會會長嘅陳弘毅（Kenneth），近排執過個形象後，即刻成個唔同晒，仲有幾分似藝人馬國明添！Kenneth聽到呢個評語後，話自己有啲怕醜，佢唔覺得似馬國明嘞，笑指覺得自己似陳弘毅，不過聽到有人咁講，都唔會唔敢睇電視嘅，只會唔敢照鏡喎！

點解突然改形象呢？Kenneth話自己之前有戴眼鏡嘅，而立法會會計界議員梁繼昌又係有戴眼鏡，兩個人仲係同一個英文名添，佢又唔想改名，所以就改個形象，方便大家分辨，佢強調連中文名都唔會改o架，皆因鍾意自己個名，亦想尊重為佢改名嘅爸爸。

Kenneth喺會計界出名做清盤嘅，對於最近有健身中心涉及清盤案件，佢都有啲建議畀受影響嘅小市民，就係未cut信用卡嘅，就拿拿聲cut咗佢嘞，因為真係冇乜嘢可以做到o架喇！

政情：轉形象似馬明 陳弘毅唔敢照鏡