香港電台管理層近年接任人選立立亂，係咪前亞視新聞高級副總裁梁家榮上任新處長後就會安定落嚟？最近傳出，助理廣播處長（電視及機構業務）陳敏娟接任後年幾，仍然未能坐正，要繼續署任落去，前任施永遠亦面對同樣情況，唔通呢個真係「三煞位」？加上多名高層即將踏入退休年齡，相信港台管理層青黃不接嘅情況只會愈趨嚴重。
話說陳敏娟喺舊年五月接任助理廣播處長一職，至今兩度未能通過遴選委員評核。但另外兩名高層，即助理廣播處長（電台及節目策劃）陳耀華、總監（電台）區麗雅都係署任約一年、甚至唔夠一年就坐正。
有消息話陳敏娟嘅情況，令人憂慮淪為廉署署任執行處首長李寶蘭翻版，但起碼陳敏娟仍可署任，唔似李寶蘭咁被取消署任。但更令人擔心嘅係多名高層即將踏入退休年齡。其中陳耀華將喺明年退休，仍未坐正嘅副廣播處長（節目）廖麗怡、總監（電視）鄭惠芳亦將喺後年，即一八年退休。陳敏娟預料二二年退休，本來係接任嘅好人選，但依家仲未能坐正，令人擔心上述三人退休後，究竟有邊個可以接任？
據講，陳敏娟對處方的決定感到疑惑，認為近年港台主力發展數碼電視頻道同接手亞視模擬頻道，算係有啲成績，反問電台近年又有乜成績。現時管理層最年輕嘅係區麗雅，如果佢要接任，似乎有機會要「轉戰」電視。
港台節目製作人員工會尋日亦去信廣播處長，直指陳敏娟嘅安排極不尋常，要求盡快交代。然而處長以廿六字真言回覆，「歲次遷，有規有序。莫用疑慮。多溝通，多表達。瞻遠觀宏，排難而進。」處長係咪以為工會參透呢廿五字真言就收貨呢？