政情：「贏在起跑線」 蘇菲指廢話
依家好多家長都務求子女「贏在起跑線」，但立法會前議員梁劉柔芬（蘇菲）尋日出席囡囡梁穎宇（Nisa）嘅新書發佈會時，就話呢句話純屬廢話。蘇菲坦言，佢媽媽係文盲，而自己亦遲至九歲先開始接觸書本，但係咁亦無礙佢日後嘅事業發展。
課堂難學處世之道
蘇菲話目前嘅教育制度，好難喺課堂上學到做人處世之道，因此有啲老人家會慨嘆，時下嘅學生讀屎片。要下一代掌握良好嘅人際關係，佢認為家長真係要為子女提供適當嘅成長環境，同埋為佢哋樹立榜樣。
囡囡Nisa早年喺美國取得碩士學位，後來更自行創業，今日略有所成著書講述心得。回想童年亦頂多係學下彈琴，唔似得時下一啲小朋友咁，琴棋書畫樣樣要學，因此佢亦都唔會迫子女去上補習班，反而係趁課餘時間陪佢哋去做義工，多啲學習待人接物嘅技巧，咁對子女嘅將來可能更有幫助。