政情：屆尾盡地一煲 阿Ann周圍開火
立法會議員經常針鋒相對，到咗本屆立法會倒數第二日，「戰火」依然未停。事緣議員梁國雄（長毛）喺立法會就《2016醫生註冊（修訂）條例草案》發言時，用「娼妓」嚟批評建制派，惹起蔣麗芸（Ann）不滿，指長毛嘅言論侮辱女性，兩人隨即爭執起嚟，仲由會議廳嘈到會議廳外。同長毛嗌完交後，阿Ann似乎意猶未盡，掉轉槍頭向「拉布」嘅醫學界議員梁家騮（怪醫）連珠炮發。唔通到屆尾，阿Ann諗住盡地一煲，周圍開火都冇有怕？
鬧交拖埋游蕙禎落水
話說長毛喺發言時批評建制，又話︰「同娼妓講貞操？食屎話屎坑臭？你哋投票都要聽中聯辦啦。」隨即引起議員麥美娟同Ann不滿，認為長毛侮辱議員同女性。阿Ann隨即同長毛爭拗，結果就畀代主席梁君彥要求佢哋肅靜。點知佢哋兩個就一齊步出會議廳，繼續針鋒相對。阿Ann就向長毛怒吼︰「我啲眼耳口鼻都係真嘅，你尊重下我。」長毛就話︰「我話你靚啫嘛，我為你着想，投咗畀游蕙禎就唔抵。」阿Ann即刻反擊︰「你投畀游蕙禎啦！你投畀你心目中嘅禎子啦！」
至於長毛同阿Ann點解會討論起阿Ann嘅樣貌，再扯埋青年新政游蕙禎落水，長毛就話因為佢見到阿Ann啲傳單「煥然一新」，「影到唔係佢咁滯」，所以怕人以後投票會投錯畀游蕙禎，所以勸阿Ann唔好嘥呢啲錢喎。游蕙禎突然被阿Ann同長毛拖落水，仲改埋花名叫「禎子」，真係唔知佢有乜嘢感想喇！
怪醫唔夠大聲投晒降
同長毛嗌完交之後，阿Ann依然仲係好好火。佢喺會議廳外見到反對草案嘅怪醫同會計界議員梁繼昌，就同佢哋爭論，又批評佢哋唔肯讓步，令希望草案通過、醫務委員會可以改革嘅病人要係咁等︰「左三年、右三年，跟住再加三年，九年喇劉美娟單嘢！」不過怪醫明顯唔接受阿Ann嘅意見，但又唔夠佢聲大，惟有係咁比手勢，叫佢收聲。
眾所周知，阿Ann喺立法會出咗名係高分貝，怪醫又點夠佢鬥吖？