中環出更：單身嫻姐 盼美娟脫「單」
工聯會立法會議員陳婉嫻（嫻姐）喺今屆立法會任期屆滿後退下火線，一生與勞工、基層、政治結下不解之緣，但自己嘅姻緣就冇着落。曾經獲女性雜誌頒發成功女性大獎嘅嫻姐話，成功嘅女性係可以同時兼顧到工作、家庭同小朋友，「我唔係成功女性」，仲提醒佢嘅戰友、都係單身嘅女議員麥美娟（Alice）勿步其後塵。
嫻姐早喺九一年參加立法局直選，九五年成功當選立法局議員，回歸後連續三屆擔任立法會議員，至○八年放棄連任，其後在一二年參選「超級區議會」重返立法會，快將七十歲嘅佢已經決定唔再連任。
「盡情做自己鍾意嘅事」
自言性格活躍嘅佢，後生時不乏追求者，拍過幾次拖，對方都係舊同學，但佢哋都唔明白「點解陳婉嫻可以忙成咁」，裙下之臣最終只能成為過客。被問到一生打拚，至今卻仍然單身，會唔會覺得人生有遺憾，佢就話年輕時鍾意群體生活，「miss（錯過）咗好多嘢」，不過都有好處，因為孑然一身，先可以盡情做自己鍾意嘅事。
從政道路唔易行，嫻姐話女性從政更係「百分百有難度」。佢話早期嘅女議員好似周梁淑儀都可以照顧到細路仔，但依家議會工作忙咗好多，就算結咗婚都唔一定可以分身生細路，但嫻姐就認為如果結婚，有細路仔會好啲，仲話「有啲人一齊，喺唔同階段一齊走係好重要」。
講到擔唔擔心Alice步自己後塵，嫻姐話Alice四十幾歲仲有機會︰「佢似我一樣陽光味濃，不過就怕佢似埋我顧住工作。」佢話已不時提醒Alice留意身邊嘅人，唔好就咁「擦身而過」。至於佢仲會唔會喺退休階段搵個人同自己「一齊走」，佢就話已經歷咗幾十年自己一個生活，唔會再諗喇！
卓妮