政情：示威者又上門轟漢奸黎亂港
聲討壹傳媒黎智英（漢奸黎）嘅行動停不了！自上月十日起整整一個月內，踩上漢奸黎何文田寓所同將軍澳壹傳媒大樓外抗議嘅次數最少十三次，當中自稱霸王國際集團員工同苦主佔咗七次，其中一次更係霸王主席陳啟源親自率領，而正義聯盟則佔三次，包括旅遊業界及其他人士則有三次。尋日又有廿四名自稱熱愛香港嘅人士，到漢奸黎寓所外抗議，怒轟「漢奸走狗黎智英、搞亂香港正衰人」。
廿四名自稱熱愛香港嘅人士尋日朝早約十一時步行到漢奸黎寓所外抗議，示威者帶同白色嘅抗議書高叫「支持香港一國兩制、維護法紀」等口號，更讀出抗議書內容，指漢奸黎「反中亂港、居心叵測、搞到香港無安寧」，又批評佢「破壞一國兩制、罔顧法紀」。
此外，示威人士更高舉印有漢奸黎嘅頭像，寫上「沒有最無恥、只有更無恥」、「漢奸走狗黎智英、搞亂香港正衰人」等字句嘅字牌。數名警員及後接報到場了解情況，而示威行動半小時後結束，示威者和平散去。
