政情：張雲正追殺 貪湯未甩難
捲入連串貪腐醜聞嘅「貪湯」前廉政專員湯顯明，律政司喺今年初宣布「放生」佢，決定不作刑事檢控，而早前更只有八名現任廉署人員接受「行政處理」，被署方作出勸誡，但貪湯同已退休嘅廉署社區關係處前處長穆斐文均獲放生。可能貪湯都以為可以甩身，不過公務員事務局就唔係咁順攤，當局雖然靜咗一排，冇乜聲氣，原來只係等緊法律意見，仲未放棄追殺佢。
涉拆單入帳 超支宴客
貪湯在任時被指濫用公帑，包括外訪、酬酢、送禮同收禮四方面，佢五年內外訪三十五次，離港一百四十六日，總開支達四百萬元，其任內廉署安排近九百次酬酢，總開支為三百五十萬元，期間更大買茅台酒，被揭發拆單入帳、自己批自己超支宴客，以及買八百多元牛雜同魚蛋等劣行，令公眾嘩然。
廉署早前講過已將貪湯酬酢事件交咗畀公務員事務局跟進，該局局長張雲正尋日出席一個活動，被問及貪湯案點處理時，佢話唔評論個別個案，但係貪湯喺二○○七年至二○○九年，用公務員身份以無薪假期方式借調到廉署服務，一般情況而言，當局對所有個案都會認真處理，一般公務員處分機制係應用喺在職公務員，但係每個個案有其特殊情況，當局喺每個個案都會去搵所有渠道，睇吓有冇規例能夠處理有關工作。
拒透露詳情 得個等字
佢又話唔係在職嘅公務員，就要探討有冇其他方法，喺現有嘅規例下做到一啲工夫，亦係貪湯案要探討嘅地方，當局仍在尋求律政司意見，睇吓喺呢個個案嘅情況之下，當局有乜嘢可以根據現有規例處理得到。
至於「其他方法」即係乜呢？佢唔肯透露。被問今年內會唔會有結果？佢就話唔係佢控制得到，希望盡快取得法律意見，讓局方跟進，但相信都要等一等。廉署調查貪湯已花咗好長時間，結果都係放生佢，依家單嘢交咗畀公務員事務局嘞，又話要等，究竟係咪想拖得就拖先？