中環出更：潮商嫌港路多彎 電動車窄駛
美國早前發生首宗涉及無人駕駛電動車嘅致命意外，引起唔少電動車用家關注，卓妮早前喺香港潮屬社團總會第八屆會董就職典禮上見到一班城中名人，當中唔少都有駕駛電動車，部分就指香港因為豁免電動車首次登記稅所以特別多人買，但由於香港道路唔似外國啲公路咁闊咁直，小路兼彎位多，所以唔太適合自動駕駛模式。
今屆潮屬社團總會由主席陳幼南冧莊做主席，佢仲係首位主席連任第二次添！講起電動車，副主席葉振南正係用家之一，但佢喺外國都唔係用自動駕駛，事關佢認為駕車係一種樂趣，好享受駕駛嘅感覺，反而部新車嘅自動泊位功能就好常用。
至於會董陳家偉就曾經訂過三部電動車，一部畀阿爸，另外兩部自用同炒賣，點知阿爸嫌車身「頂頭」唔舒服，剩低嗰兩部就等極未到，結果三部都退晒貨。雖然電動車將係大趨勢，但佢話香港始終路窄車多，就算買咗電動車都唔適合自動駕駛，除非一開始設計個城市時已決定用晒電動車，否則起碼都要約十五年後先會全民轉用。
免稅期將完 減使用誘因
同場仲有潮屬社團總會常董「新小巴大王」馬僑生、副秘書長兼冠忠巴士集團董事鄭敬凱、常董張俊勇等。馬僑生同鄭敬凱分別試過引入電動巴士及小巴，但同樣都係因為叉電時間太長、行車時間卻太短而停用，正等待新一批技術更成熟嘅推出市場。
有研究開車嘅潮州商會青委林思俊話，有車廠稱在港使用電動車只係將碳排放由道路轉移至充電嘅發電廠，而政府因電動車環保而推出嘅免稅優惠期限暫只到一七年，加上電動車外形唔特別討好，若果唔再獲免稅其吸引力將大減。
卓妮