政情：區議會遇彈弓手 范國威(火羅)爆

西貢區議員質疑結果須扭轉

今年施政報告提出撥款十億元成立「一帶一路」獎學金計劃，資助「一帶一路」國家學生來港交流升學，其後喺輿論壓力下改為雙向資助，即同時資助本港學生到「一帶一路」國家交流。政府原本諗住打尖等財委會通過，可惜喺各黨派群起質疑同反對下，最終「跪低」將撥款押後至下屆立法會審議。雖然如此，但范國威仍喺西貢區議會上動議取消計劃，仲提出將十億元獎學金用嚟增加學額，幫助更多本地學生升學。

據了解，動議原本喺八票支持、七票反對、一票棄權嘅情況下獲得通過，但西貢區議員溫悅昌喺顯示投票結果後，先話自己係投反對票，電腦未能顯示其投票決定。另一區議員區能發就指自己投錯票，投票結果最終扭轉為八票支持、八票反對、一票棄權，再加上吳仕福投下反對票，動議最終由通過變否決。范國威批評建制派為政府護航，不惜違反議事規則去改變投票結果，又質疑主席處理投票糾紛手法不公。

趨政治化 無約束力照提

溫悅昌回應查詢時話，因為唔清楚動議內容，本來想問清楚內容先投票，點知問完已經過咗投票時間，惟有舉手表示反對，但最終他嘅投票意向無計算在內，所以動議被否決與佢無關。佢又話，依家區議會愈來愈政治化，好似「一帶一路」獎學金議題根本唔應該提上區議會討論，因為動議通過與否都無約束力。本報亦曾聯絡區能發，但至截稿前仍未有回覆。其實有關計劃已經押後至下屆立法會處理，即使西貢區議會通過動議反對，相信亦唔會帶來任何改變同回響。