今年五月一場大雨，令香港電台電視大廈同廣播大廈天花漏水，亦揭示港台自從被立法會否決興建新大樓後，仲係屋漏兼逢連夜雨，可以話係再次發出警號，要政府快啲搞新大樓，但主理嘅商務及經濟發展局局長蘇錦樑（Greg蘇）卻闊佬懶理，當無事發生過咁。據了解，負責處理新大樓工程嘅副廣播處長（發展）戴淑嬈即將調任，由另一政務官（AO）葉李杏怡接手，相信政府希望新人事新作風，為新大樓重新上路，但以Greg蘇歎慢板咁款，就算換新人，都未必可以闖關成功。
商經局前年年初向工務小組申請逾六十億元嘅撥款用作興建港台新大樓，因為造價太貴，被建制泛民同聲反對，指摘係大花筒，之後就算「減磅」七億元，仍不獲支持。當時議員要求Greg蘇重新諗過一個方案送返去工務小組審議，但至今冇晒下文。局方喺今年預算案嘅書面回覆中就話，由於研究過程中所遇到嘅問題比預期複雜，港台需要多啲時間處理，即係唔知幾時先有眉目。
話說副廣播處長（發展）一直負責處理新大樓興建等事宜，呢個位由首長級第三級（D3）政務官擔任，但港台節目以至管理一向都有唔少爭議，唔係有好多AO想做呢個三煞位。話雖如此，戴淑嬈前兩任嘅副廣播處長，即係傅小慧同梁松泰分別升官至D6嘅駐京辦主任及D4嘅政制及內地事務局副秘書長，所以都係「塞翁失馬、焉知非福」。
據聞，戴淑嬈將會調任勞工及福利局副秘書長。佢呢幾年出盡力，最後新大樓都係功敗垂成，而且佢已做咗呢個位四年多，都差唔多調任。接任嘅葉李杏怡，最近擔任食水含鉛超標調查委員會秘書，委員會調查完畢，算係功成身退。佢今次係平調，觀乎佢再之前個位係運輸及房屋局副秘書長，負責航空交通。葉李杏怡處理過食水含鉛超標以及民航處亂局，今次處理港台新大樓，都要睇吓Greg蘇係咪真係有心做嘢，若果仲係一味拖，新大樓都係遙遙無期。