政情：海洋公園添勁敵 CEO唔憂被搶客
內地遊客減少，又面對上海迪士尼上月開幕，但喺本月接替苗樂文出任海洋公園行政總裁嘅李繩宗就話睇唔到有搶客嘅危機。係咪睇輕咗競爭對手？唔係，佢有自己嘅一番道理嘅。
李繩宗話因為長江三角洲有逾億人口，「計起上嚟有排做，自己市場都做唔切，點會搞其他地方？」佢又笑指早前到上海迪士尼一遊，該園表演以普通話為主，外國人聽唔明白，而海洋公園就有中、英、普通話三種語言，較為國際化，吸引各國旅客，未來亦會開發印度、印尼、台灣等新客源。
海洋公園明年四十周年，將推出多項優惠益街坊，研究引入虛擬實景VR技術，喺旅客輪候遊樂設施時加插遊戲同資訊邊等邊玩，但佢冇回應會唔會加價，話最重要係樂園軟件同硬件足令旅客感到物超所價。對前景樂觀嘅佢更話，回想沙士時令數千萬盈餘數月內清袋但園方亦無裁員，依家冀與員工共渡難關，海洋公園長遠會轉型水上樂園同酒店嘅度假區吸引更多旅客。