政情：借脫歐平反 波叔撩交嗌

英國脫歐可能對香港金融市場帶來嘅波動，香港財金官員早前逐一開腔回應，最新連負責覓地建屋嘅波叔亦透過網誌評論一番，佢最新網誌以「脫歐反思」為題，指除咗喺經濟層面、英國脫歐公投喺政治層面都引起唔少反思，由此引伸並提醒大家喺重大而複雜嘅公共議題上，點樣令社會清晰掌握全面同客觀嘅資訊，以討論並作取捨實為重要。

稱近選舉期 面對失實指控

波叔以新界東北發展同埋大埔綠化地帶改劃嘅司法覆核案為例，其中東北計劃喺一二年中第三階段公眾參與活動初期，唔少人包括好多泛民主派議員曾促請政府盡快推行計劃，但係其後唔夠兩、三個月接近立法會選舉期間，有關計劃突然面對好多片面同失實嘅指控，例如有人宣稱新界東北新市鎮日後可讓內地人免簽證自由出入，引起爭議，就此，政府一直做好解說工作釋除公眾疑慮。

佢其後續指有人認為任何政策本質上都涉及政治，因此唔認同現時嘅公共討論有「泛政治化」嘅現象，另外佢亦同意，大部分公共政策均涉及公權力行使、資源及權益嘅分配，但同時強調咁唔代表喺討論問題時應片面咁接收資訊，或隨意扭曲、誇大問題，只求營造聳動效果，否則社會最終無法就爭議課題理性務實地尋求最大公約數。

忽然勇猛 被斥「先撩者賤」

政圈目前對於改革醫務委員會爭議，牛頭角迷你倉四級大火檢討善後工作金睛火眼，暫時逃離政治風眼嘅波叔忽然勇猛，以英國脫歐公投借題發揮重提東北爭議，似乎觸動咗泛民議員神經，其中新民主同盟范國威批評當年捲入囤地爭議嘅波叔係「撩交嗌」，甚至係「先撩者賤」，重申當年傳媒披露的議題都係有根有據。話時話多言必敗，波叔會唔會將東北爭議炸彈重新打開一扇門，抑或隨時將火頭又燒番埋身，大家要拭目以待！