中環出更：眾志搞「公投自決」隨時捉蟲
香港眾志（眾志）倡議公投自決，但唔知點解時間表唔按譜，不斷咁「搬龍門」，該政黨副主席黎汶洛尋日出席電台節目時，更進一步闡述包括中共全面接管等多個公投嘅選項，被問及若市民大多數選擇中共接管，佢會唔會接受時，佢表明若果公投平台有認受性，就要接受。咁咪即係用石頭揼自己隻腳，分分鐘「捉蟲」喎。
間接自我質疑認受性
黎汶洛話眾志長遠希望推動公投自決，包括由港人公投2047年後香港應該獨立、延續一國兩制、由中共全面接管或其他選項，又話公投唔能夠扼殺其他選項。既然咁多選項，被問到若大多數市民選擇由中共接管，佢係咪仍會接受公投結果呢？佢坦言個人唔喜歡由中共管治，不過若公投平台有認受性，就要接受。若果結果真係咁，眾志咪捉蟲囉！再講，由眾志推動公投，平台當然係佢哋建立o架喇，佢咁講，唔通都質疑自己搞嘅平台冇認受性？
青年新政發言人黃俊傑亦喺節目中話佢哋同樣支持自決，但同香港眾志嘅分別在於對身份認同嘅睇法。佢指香港人身份被模糊化，又指民主嘅「民」若果唔係香港人，投票結果未必係對香港最好嘅選項。
卓妮