中環出更：手機監聽風雲政商界未驚過
早前有報道指有社交網絡嘅手機應用程式，會透過手機收音裝置全天候收集用戶周遭聲音，包括用戶同友人對話，作用猶如監聽器，班政商界名人驚唔驚呢？點樣可以防範？
話說菁英會早前舉行周年大會，選出新一屆執委會成員，主席盧金榮再次冧莊，莊家彬為常務副主席，另外仲多咗兩個新副主席。問莊家彬會唔會以後熄咗手機先開會或者傾重要嘢，佢就似乎唔太擔心，仲話唔通要用番啲老爺機咩，認為避都避唔到咁多咁話。
黃麗芳建議學斯諾登放入雪櫃
做IT嘅菁英會副主席黃麗芳就話，若果真係咁擔心，可以學美國中央情報局前特工斯諾登咁，熄咗部電話放落雪櫃，皆因雪櫃嘅構造有效阻隔手機電磁波。至於身邊嘅司庫廖偉麟個外套袋就正好袋住部智能電話仲突咗個鏡頭出嚟，佢隨即掉番轉部手機放，笑言費事陣間被誤會偷拍喎。
今年菁英會繼續大力推動青年工作，除咗有訪京團之外，佢哋暑假仲會帶一班香港大學生去到前海、天津及深圳，參加「香港大學生暑期內地實習計劃」，帶佢哋認識內地嘅商機，亦會舉辦兩年一度嘅菁英論壇。
話說菁英會今年仲多咗啲成員嘅二代加入，好似副主席甄韋喬（Mickey）兒子甄偲瀚，而另一成員胡汶傑，佢媽媽本來亦係菁英會成員。甄偲瀚話平日成日同爸爸出席唔同活動，已經開始適應，爸爸亦冇特別畀乜嘢指示或壓力佢，純粹希望佢擴闊視野學多啲成功經驗。
卓妮