天時地利人和,有時真係缺一不可,而港府年初提出設立十億元「一帶一路」獎學金,就印證咗呢六個字嘅重要性。有政界中人評估,政府日前宣布「跪低」,唔再將「一帶一路」獎學金硬闖立法會財務委員會,已失去咗「過關」嘅最佳時機,因為一如政界傳聞,如有涉及十七萬公務員福祉嘅加薪項目作為「掩護」,雖然部分建制派對此仍有疑慮,仍可以喺議會放手一博。
不過,泛民主派對於「一帶一路」獎學金與公務員加薪綑綁傳聞如獲至寶,提早唱響集結號反對,狠批計劃無必要,有激進泛民更表明會瘋狂拉布,凡此種種,都令到建制派有壓力,未敢義無反顧力撐,紛紛提出停一停,諗一諗嘅建議,包括將計劃撥款申請排至財委會議程最後,當局應先尋求商界贊助成立獎學金,不應堅持申請撥款等。教育局最終亦面對現實,早前宣布將撥款押後至下屆立法會審議。
可以肯定嘅係,「一帶一路」獎學金嘅闖關大計推倒重來,將產生好多變數。隨着新一屆立法會喺十月復會,教育局重新作出政治游說嘅工作必不可少,無可避免要喺議會重新走程序,第一關係教育事務委員會,然後再排隊上財委會,教育局局長吳克儉若再高舉過去嘅「一帶一路」獎學金非零和遊戲嘅論調,肯定唔能夠釋除泛民議員質疑計劃旨在向中央「擦鞋」嘅疑慮。
有建制派中人指,教育局未來如要為「一帶一路」獎學金創造條件,最重要係解答兩大問題,一係於未解決大學學位不足問題下,點解要以公帑去資助「一帶一路」沿線國家學生來港升學嘅理據;二係當局有否調查或數據顯示,「一帶一路」沿線國家係香港學生升學嘅選擇。就睇當局如何以理服人,唔好再無神經,再於政治泥沼中重新上路。